حلّت الممثلة السّورية نور علي ضيفة في برنامج "تفاعلكم" مع الإعلاميّة السعودية سارة الدندراوي، حيث كشفت عن تفاصيل جديدة حول ما جرى معها في جبلة باللاذقية.
وقالت نور علي:"خليني وضح أوّل شي. أنا أوّل ما طلعت ما كنت عم إحكي عني بشكل شخصي. الإعتداء اللي صار عليي، اللي صار عليي صار على العالم أكتر بكتير، أنا تكذبت انو انا عم صور من لبنان وهالشي مش مضبوط".
تابعت:"أنا كنت بسوريا، كنت بجبلة وعلقت بالصدفة كنت طالعة عالتصوير، بغض النظر عن هالتفاصيل، والناس اللي بتحب تعمل حرب على السوشيل ميديا".
أضافت: "أنا طلعت احكي لأنّو حسيت إنّو صار فيني إطلع احكي، صارت كلمتنا عم تنسمع، وأنا وقت طلعت وحكيت إنّو في بعض الاعتداءات اللي صارت على المدنيّين، مو بعض، صار في كتير اعتداءات على المدنيّين والتجاوزات".
وقالت: "برجع بأكّد وبقول مو من الأمن العام، من بعض الفصائل اللي نحنا ما بنعرف مين هنن، كنت عم إحكي لأنّو كان عندي أمل كبير إنّو ينسمع صوتي، وفعلاً نسمع، يعني هلأ عم نشوف حتّى رئيس الدولة والأمن العام اعترف بالتجاوزات وعم يحاسب كل حدا عمل تجاوزات، كل يوم عم نشوف في ناس عم يعتدوا على مدنيين وعم يتحاسبوا".
وتابعت: "وبدي قول اللي صار تأثرت فيه بزيادة لأنّو أنا كان رأيي من أوّل لحظة، أيّ حدا حامل سلاح من غير الدولة أو ما يسمى بفلول النظام إنّو يتحاسبوا من الأوّل لما نوصل لهالمرحلة".
وتابعت: "بعد تسعين يوم من الهدوء والسلام، أنا شخص كنت جدًّا متفائل من اللي حيصير، كان عندي إحساس إنّي الي رح يصير أحسن، إنّك ترجعي تشوفي وجع هو جدا قاسي بالنسبة إلي لايف، متل ما غيري شاف لايف بالـ 14 سنة، وجعنا واحد بدي قول، بدي قول بالكلمة والشي الحلو اللي بيناتنا بنقدر نصلح، وبدي قول بتمنى يتحاسب كل شخص حامل سلاح غير الدولة، ويتحاسب كل شخص اعتدى على المدنيّين بنفس الوقت".
